व्यसनमुक्ती

व्यसन म्हणजे एखादी अशी सवय की ज्यामुळे मोठ्या प्रमाणावर शारीरिक, मानसिक व सामाजिक त्रास होत असल्याची जाणीव होत असूनही त्यात बदल करणे शक्य होत नाही. व्यसन हे एक विनाशकारी वादळ आहे. या वादळात आज आपल्या देशातील युवा पिढी अडकलेली आहे. या विनाशकारी वादळाला आत्ताच जर थांबवले नाही तर कितीतरी कोवळे युवक आणि युवती नव्या शतकाच्या पहिल्या उगवता सूर्य बघण्यासाठी शिल्लकच राहणार नाहीत. तेंव्हा मित्रहो सावध व्हा. आता तरी जागे व्हा आणि या देशाला विनाशक मार्गांकडे जाण्यापासून थांबवण्याचा प्रयत्न करा. मेंदूला बधिर करणाऱ्या कोणत्याही मादक पदार्थाचे म्हणजेच तंबाखू, सिगारेट, दारू, गांजा, चरस, झोपेच्या गोळ्या इ. अशा प्रकारच्या कोणत्याही पदार्थाचे अतिरेकी सेवन करणाऱ्या व्यक्तीला व्यसनी ही पदवी प्राप्त होते. आप्तपरिवार, मित्रमंडळी अशा अगणित कुटुंबांना दुःखात लोटत असते. मुख्य म्हणजे याची जाणीव त्याला असली तरी त्याचा नाईलाज असतो. इतका तो व्यसनाच्या आहारी जाऊन हतबल झालेला असतो. त्यालाच म्हणायचे व्यसनापायी ओढून घेतलेली मानसिक गुलामगिरी. या सगळ्या गोष्टीचा विचार केल्यावर या विनाशकारी वादळाची तीव्रता किती भयंकर आहे हे कळते. फक्त इच्छाशक्तीच्या बळावर दारू सुटू शकत नाही. त्याला योग्य प्रयत्नांची जोड, योग्य मार्गदर्शन तसेच योग्य औषधोपचार यांची साथ हवी.